સિક્યોરિટીઝ એન્ડ એક્સચેન્જ બોર્ડ ઓફ ઈન્ડિયા (સેબી) એ બેનહેમ સ્ટોક બ્રોકિંગ અને નિન્જા સિક્યોરિટીઝ સહિતની છ કંપનીઓને ‘ફ્રન્ટ રનિંગ’ બિઝનેસમાં સામેલ થવા બદલ મૂડીબજારમાંથી પ્રતિબંધિત કર્યો છે. સેબી દ્વારા પ્રતિબંધિત અન્ય લોકોમાં કૌશલ ચંદારાણા, મનીષ મહેતા, કાશ્મીરા મહેતા અને સુમતિલાલ મહેતાનો સમાવેશ થાય છે.
માર્કેટ રેગ્યુલેટરે એન્વિલ વેલ્થ મેનેજમેન્ટના શેર ટ્રેડિંગમાં ફ્રન્ટ રનિંગ (આગોતરી માહિતીના આધારે ખરીદ-વેચાણ)માં સામેલ થવા બદલ તેમની સામે કાર્યવાહી કરી છે. આ સાથે ખોટી રીતે કમાયેલા 2.23 કરોડ રૂપિયા પણ જપ્ત કરવામાં આવ્યા છે.
સેબીએ મંગળવારે તેના વચગાળાના આદેશમાં જણાવ્યું હતું કે આ કંપનીઓને ખોટી રીતે હસ્તગત કરેલી રકમ જમા ન થાય ત્યાં સુધી તેમની કોઈપણ સંપત્તિ અથવા શેરનું વેચાણ ન કરવા પણ કહેવામાં આવ્યું છે. સેબીએ તેની તપાસમાં શોધી કાઢ્યું હતું કે પોર્ટફોલિયો મેનેજમેન્ટ સર્વિસ પ્રોવાઈડર, એન્વિલ વેલ્થ મેનેજમેન્ટ દ્વારા જારી કરાયેલા બાકી નિર્દેશો પહેલા નિન્જા અને બેનહેમે ઘણા શેર્સમાં ટ્રેડિંગ કર્યું હતું.
