ઈન્ડિયન પ્રીમિયર લીગ 2022: ઈન્ડિયન પ્રીમિયર લીગ (આઈપીએલ) માં, ગુરુવારે દિલ્હી કેપિટલ્સ અને લખનૌ સુપર જાયન્ટ્સ વચ્ચે મેચ રમાઈ હતી, જે કેએલ રાહુલની આગેવાની હેઠળની ટીમે છ વિકેટે જીતી હતી. આ મેચ હાર્યા બાદ દિલ્હી કેપિટલ્સના કેપ્ટન ઋષભ પંતને વધુ એક આંચકો લાગ્યો છે. આ મેચમાં ધીમી ઓવર રેટ માટે પંતને 12 લાખ રૂપિયાનો દંડ ભરવો પડશે. દિલ્હી કેપિટલ્સની ટીમે નિર્ધારિત સમયમાં ઓછી ઓવરો ફેંકી અને કેપ્ટન પંતને તેની અસર ભોગવવી પડી.
ઈન્ડિયન પ્રીમિયર લીગે આ વાતની પુષ્ટિ કરી છે. IPLના નિવેદન અનુસાર, ‘ધીમી ઓવર રેટ માટે દિલ્હી કેપિટલ્સ પર દંડ ફટકારવામાં આવ્યો છે. IPL 2022 માં દિલ્હી કેપિટલ્સ દ્વારા IPL આચાર સંહિતા હેઠળ આ પહેલો ગુનો છે, તેથી પંતને 12 લાખ રૂપિયાનો દંડ ભરવો પડશે.
આ મેચમાં દિલ્હી કેપિટલ્સને છ વિકેટે હારનો સામનો કરવો પડ્યો હતો. આ સિઝનમાં દિલ્હી કેપિટલ્સનો આ સતત બીજો પરાજય છે, જ્યારે લખનૌ સુપર જાયન્ટ્સે સતત ત્રીજી જીત નોંધાવી છે. આ પહેલા દિલ્હી કેપિટલ્સને ગુજરાત ટાઇટન્સે 14 રને પરાજય આપ્યો હતો. લખનૌ સુપર જાયન્ટ્સ અને ગુજરાત ટાઇટન્સ માટે આ પ્રથમ IPL સિઝન છે.
