અદાણી જૂથના તાજા સમાચાર: અદાણી જૂથ આંધ્રપ્રદેશમાં બે સિમેન્ટ મેન્યુફેક્ચરિંગ પ્લાન્ટ, 15,000 મેગાવોટનો રિન્યુએબલ એનર્જી પ્લાન્ટ અને ડેટા સેન્ટર સ્થાપશે. અદાણી ગ્રૂપના ચેરમેન ગૌતમ અદાણીના પુત્ર કરણ અદાણીએ શુક્રવારે જાહેરાત કરી હતી કે જૂથ રાજ્યમાં તેની હાજરી બમણી કરવા માંગે છે. અહીં આંધ્રપ્રદેશ ગ્લોબલ ઇન્વેસ્ટર્સ સમિટમાં બોલતા, તેમણે કહ્યું કે જૂથ રાજ્યમાં કાર્યરત બે સમુદ્રી બંદરો કૃષ્ણપટ્ટનમ અને ગંગાવરમની ક્ષમતા બમણી કરવાની યોજના ધરાવે છે. જોકે, તેમણે કોઈ ચોક્કસ આંકડો આપ્યો ન હતો.
આ રોકાણ રાજ્યમાં પહેલાથી જ રોકાણ કરાયેલા રૂ. 20,000 કરોડ ઉપરાંત હશે. આનાથી રાજ્યમાં 18,000 પ્રત્યક્ષ અને 54,000 પરોક્ષ રોજગારીનું સર્જન થશે. ગ્રૂપના અદાણી પોર્ટ્સ એન્ડ SEZ લિમિટેડના ચીફ એક્ઝિક્યુટિવ ઓફિસર (CEO) કરણ અદાણીએ જણાવ્યું હતું કે જૂથ રાજ્યના કુડ્ડાપાહ અને નદીકુડી ખાતે વાર્ષિક 10 મિલિયન ટન સિમેન્ટ પ્લાન્ટ અને વિશાખાપટ્ટનમ ખાતે 400 મેગાવોટનું ડેટા સેન્ટર સ્થાપશે.
અમેરિકી શોર્ટ સેલર હિંડનબર્ગ રિસર્ચ દ્વારા અદાણી જૂથ પર છેતરપિંડીનો આરોપ મૂકાયા બાદ પરિવારનો કોઈ સભ્ય જાહેરમાં સામે આવ્યો તેવો આ પ્રથમ પ્રસંગ હતો. અગાઉ ઉત્તર પ્રદેશ સરકાર દ્વારા આયોજિત આવા જ રોકાણકાર સંમેલનમાં ગૌતમ અદાણીની ગેરહાજરી ચર્ચામાં રહી હતી.
