વરાછામાં મ્યુનિ.ના પાર્કિંગમાંથી મર્સીડીઝ કારની ચોરી ખુદ કોન્ટ્રાકટરે કરાવી હતી

– સુરત મ્યુનિ.ના કોન્ટ્રાક્ટરનો કારભાર : ઘણા સમયથી પાર્ક રૂ.12 લાખની મર્સીડીઝની ચોરીમાં સામેલ પાર્કીંગ કોન્ટ્રાકટરના હીરા દલાલ મિત્ર, ગેરેજ માલિક ઝડપાયા

– રૂ.95 હજારમાં સોદો કરી મર્સીડીઝને રાત્રે ટોઈંગ કરી લઈ જનાર કઠોરનો સરફરાઝ ઉર્ફે મુકુંદ કબાડી વોન્ટેડ

સુરત, : સુરતના વરાછા મીનીબજાર એસએમસી પાર્કીંગમાં મુકેલી નાકોડા ટેક્ષટાઈલની જપ્ત કરેલી રૂ.12 લાખની કિંમતની મર્સીડીઝ કારની ચોરી ખુદ પાર્કીંગ કોન્ટ્રાકટરે કરાવી હતી.ક્રાઈમ બ્રાન્ચે મર્સીડીઝની ચોરીમાં સામેલ પાર્કીંગ કોન્ટ્રાકટર, તેના હીરા દલાલ મિત્ર, ગેરેજ માલિકની ધરપકડ કરી રૂ.95 હજારમાં સોદો કરી મર્સીડીઝને રાત્રે ટોઈંગ કરી લઈ જનાર કઠોરના કબાડીને વોન્ટેડ જાહેર કર્યો છે.

ક્રાઈમ બ્રાન્ચના સૂત્રો દ્વારા પ્રાપ્ત થતી વિગતો મુજબ સુરતના વરાછા મીનીબજાર એસએમસી પાર્કીંગમાં મુકેલી નાકોડા ટેક્ષટાઈલની જપ્ત કરેલી રૂ.12 લાખની કિંમતની મર્સીડીઝ કારની ચોરી પાંચ મહિના થયાની ફરિયાદ એક મહિના અગાઉ વરાછા પોલીસ મથકમાં નોંધાઈ હતી.આ બનાવની તપાસમાં જોડાયેલી ક્રાઈમ બ્રાન્ચની વાહનચોરી સ્ક્વોડના પીએસઆઈ અને ટીમે ટેકનીકલ સર્વેલન્સના આધારે મર્સીડીઝની ચોરીમાં સામેલ મીનીબજાર એસએમસી પાર્કીંગના પાર્કીંગ કોન્ટ્રાકટર વિજય વિઠ્ઠલભાઈ સુતરીયા ( ઉ.વ.43, રહે.21/એ, શ્યામનગર સોસાયટી, વસંત ભીખાની વાડી સામે, લંબે હનુમાન રોડ, વરાછા, સુરત ), તેમના હીરા દલાલ મિત્ર હિરેન ઘનશ્યામભાઈ માણીયા ( ઉ.વ.28, રહે.બી-304, આંગન રેસિડન્સી, સુદામા ચોક પાસે, મોટા વરાછા, સુરત ) અને સીમાડા નાકા પાસે શિવ મોટર્સના નામે ફોર વ્હીલનું ગેરેજ ધરાવતા મયુર ભોળાભાઈ ચોટલીયા ( ઉ.વ.22, રહે.ઘર નં.6, રંગ અવધૂત સોસાયટી, કેનાલ રોડ, પુણાગામ, સુરત ) ની ધરપકડ કરી હતી.

ક્રાઈમ બ્રાન્ચે તેમની પુછપરછ કરતા જાણવા મળ્યું હતું કે મર્સીડીઝ ઘણા સમયથી ત્યાં પડી રહી હોય પાર્કીંગ કોન્ટ્રાકટર વિજય સુતરીયાએ તેના વિશે તપાસ કરતા તે જપ્ત થઈ હોવાની જાણ થઈ હતી.આથી કારને વેચવા માટે તેણે હીરા દલાલ મિત્ર હિરેન મારફતે ગેરેજ માલિક મયુરનો સંપર્ક કરી તેને ચાવી લઈ બોલાવી કાર ચાલુ કરવા પ્રયાસ કર્યો હતો.જેથી કાર લઈ જઈ વેચી શકાય.પણ કાર ચાલુ નહીં થતા તેમણે કઠોરના ભંગારના વેપારી સરફરાઝ ઉર્ફે મુકુંદ કબાડી સાથે રૂ.95 હજારમાં સોદો કર્યો હતો.બાદમાં સરફરાઝ કારને રાત્રે ટોઈંગ કરી લઈ ગયો હતો.ક્રાઈમ બ્રાન્ચે સરફરાઝની તપાસ કરી હતી.પણ તે કે તેને ત્યાં મર્સીડીઝ મળી નહોતી.ક્રાઈમ બ્રાન્ચને આશંકા છે કે સરફરાઝે મર્સીડીઝના પાર્ટસ કાઢી વેચી નાખ્યા છે.ક્રાઈમ બ્રાન્ચે સરફરાઝને વોન્ટેડ જાહેર કરી વધુ કાર્યવાહી હાથ ધરી છે.

વિજય સુતરીયા છેલ્લા દોઢ વર્ષથી સુરતમાં ત્રણ સ્થળે પાર્કીંગ કોન્ટ્રાકટ ધરાવે છે

સુરત, : મર્સીડીઝ કારની ચોરીમાં ઝડપાયેલો વરાછા મીનીબજાર એસએમસી પાર્કીંગનો કોન્ટ્રાકટર વિજય સુતરીયા મીની બજાર મલ્ટીલેવલ પાર્કીંગ ઉપરાંત કાદરશાની નાળ મલ્ટીલેવલ પાર્કીંગ તેમજ પીપલોદ રાહુલ રાજ મોલ પાસે રોડ પર સત્કાર એન્ટરપ્રાઈઝના નામે છેલ્લા દોઢ વર્ષથી પાર્કીંગનો કોન્ટ્રાકટ ધરાવે છે.