રિયલ એસ્ટેટ સેક્ટરને છેલ્લા પાંચ વર્ષમાં $32 બિલિયનની ઇક્વિટી મૂડી પ્રાપ્ત થઈ છે અને આગામી બે વર્ષમાં $12-13 બિલિયનનું વધુ રોકાણ પ્રાપ્ત થવાની ધારણા છે. રિયલ એસ્ટેટ એડવાઈઝરી ફર્મ CBRE એ આ અનુમાન લગાવ્યું છે.
CBREએ એક રિપોર્ટમાં જણાવ્યું છે કે 2023 અને 2024માં રિયલ એસ્ટેટ સેક્ટરમાં સૌથી વધુ રોકાણ ઓફિસ સ્પેસમાં થવાની શક્યતા છે. કુલ સંસ્થાકીય રોકાણમાં ઓફિસ સ્પેસ પછી ઔદ્યોગિક અને લોજિસ્ટિક વિસ્તારો અને જમીન અને પ્લોટ મળી શકે છે. આ સિવાય ડેટા સેન્ટરમાં પણ જંગી રોકાણ મળવાની અપેક્ષા છે.
ઇક્વિટી રોકાણોમાં પ્રાઇવેટ ઇક્વિટી ફંડ્સ, પેન્શન ફંડ્સ, સોવરિન વેલ્થ ફંડ્સ, સંસ્થાકીય રોકાણકારો, રિયલ એસ્ટેટ ડેવલપર્સ, ઇન્વેસ્ટમેન્ટ બેન્કો, કોર્પોરેટ જૂથો અને રિયલ એસ્ટેટ ઇન્વેસ્ટમેન્ટ ટ્રસ્ટ્સ (REITs)નો સમાવેશ થાય છે.
CBRE એ જણાવ્યું છે કે રિયલ એસ્ટેટ સેક્ટરમાં ઇક્વિટી પ્રવાહનો ટ્રેન્ડ વધુ ચાલુ રહેવાની અપેક્ષા છે અને આગામી બે વર્ષમાં લગભગ $12-13 બિલિયનનું રોકાણ આવવાની શક્યતા છે. રિયલ એસ્ટેટ સેક્ટરને 2024 સુધીમાં સરેરાશ વાર્ષિક $6-7 બિલિયનનું ઇક્વિટી રોકાણ પ્રાપ્ત થવાની ધારણા છે.
CBRE ના ચેરમેન અને ચીફ એક્ઝિક્યુટિવ ઓફિસર (ભારત, પશ્ચિમ એશિયા અને આફ્રિકા) અંશુમન મેગેઝીને જણાવ્યું હતું કે, “ભારતને ચીનની બહાર પ્રોડક્શન બેઝ બનાવવા માટે ઘણી વૈશ્વિક કંપનીઓની વ્યૂહરચનાથી ફાયદો થવાની સંભાવના છે. જેના કારણે રિયલ એસ્ટેટમાં રોકાણમાં વધારો થવાની સ્થિતિ જોવા મળી રહી છે.
રિપોર્ટ અનુસાર, ભારતમાં રિયલ એસ્ટેટ સેક્ટરમાં ઇક્વિટી રોકાણ 2018માં $5.9 બિલિયનથી વધીને 2019માં $6.4 બિલિયન થયું છે. તે વર્ષ 2020માં છ અબજ ડોલર, 2021માં 5.9 અબજ ડોલર અને 2022માં 7.8 અબજ ડોલર હતું.
