મજબૂત અમેરિકન ચલણ અને સ્થાનિક ઇક્વિટી બજારોમાંથી વિદેશી ભંડોળના પ્રવાહને કારણે શુક્રવારે શરૂઆતના વેપારમાં યુએસ ડોલર સામે રૂપિયો આઠ પૈસા ઘટીને 82.05 થયો હતો.
વેપારીઓએ જણાવ્યું હતું કે સ્થાનિક અને વૈશ્વિક શેરબજારમાં નકારાત્મક વલણની અસર ભારતીય ચલણ પર પણ પડી છે. જો કે, ક્રૂડ ઓઈલના ભાવ પ્રતિ બેરલ $75ની નીચે જવાના કારણે રૂપિયાની ખોટ મર્યાદિત હતી.
ઇન્ટરબેંક ફોરેક્સ માર્કેટમાં રૂપિયો 82.05 પર નબળો ખૂલ્યો હતો અને ડોલર સામે 82.07-82.04ની રેન્જમાં ટ્રેડ થયો હતો. સમાચાર લખાય છે ત્યારે ડોલર સામે રૂપિયો અગાઉના બંધ ભાવ કરતાં આઠ પૈસા ઘટીને 82.05ના સ્તરે હતો.
ગુરુવારે ડોલર સામે રૂપિયો 81.97 ના સ્તર પર બંધ થયો હતો. દરમિયાન, ડૉલર ઇન્ડેક્સ, જે છ મુખ્ય કરન્સીની બાસ્કેટ સામે યુએસ ડૉલરની સ્થિતિને પ્રતિબિંબિત કરે છે, તે 0.20 ટકા વધીને 102.59 પર હતો. વૈશ્વિક ઓઇલ બેન્ચમાર્ક બ્રેન્ટ ક્રૂડ 0.69 ટકા ઘટીને $73.63 પ્રતિ બેરલ હતું.
વિદેશી સંસ્થાકીય રોકાણકારો (FII)એ ગુરુવારે રૂ. 693.28 કરોડના શેરનું વેચાણ કર્યું હતું, તેમ શેરબજારના આંકડાઓ અનુસાર.
