સરકારે શુક્રવારે જણાવ્યું હતું કે સપ્ટેમ્બરમાં પૂરા થતા વર્તમાન માર્કેટિંગ વર્ષમાં ખાંડ મિલોએ શેરડીના ખેડૂતોને અત્યાર સુધીમાં લગભગ રૂ. 1.04 લાખ કરોડ ચૂકવ્યા છે, જ્યારે રૂ. 9,499 કરોડ ચૂકવવાના બાકી છે. ઉપભોક્તા બાબતો, ખાદ્ય અને જાહેર વિતરણ રાજ્ય મંત્રી સાધ્વી નિરંજન જ્યોતિએ રાજ્યસભામાં એક પ્રશ્નના લેખિત જવાબમાં જણાવ્યું હતું કે ખેડૂતોને શેરડીની બાકી ચૂકવણી એ સતત પ્રક્રિયા છે અને છેલ્લા પાંચ વર્ષથી શેરડીની બાકી રકમમાં સતત ઘટાડો થઈ રહ્યો છે.
ખાંડની સિઝન 2020-21 સુધી લગભગ 99.9% શેરડીની બાકી ચૂકવણી કરવામાં આવી છે
તેમણે માહિતી આપી હતી કે ખાંડની સિઝન 2020-21 સુધી, લગભગ 99.9 ટકા શેરડીની બાકી રકમ ક્લિયર કરવામાં આવી છે. મંત્રીએ જણાવ્યું હતું કે, “છેલ્લી ખાંડની સિઝન 2021-22 માટે, 99.9 ટકાથી વધુ શેરડીની બાકી ચૂકવણી કરવામાં આવી છે અને વર્તમાન ખાંડની સિઝન 2022-23માં, 17 જુલાઈ, 2023 સુધી લગભગ 91.6 ટકા શેરડીની બાકી ચૂકવણી કરવામાં આવી છે.”
આ પણ વાંચો: વિશ્વના સૌથી મોટા સપ્લાયરએ ચોખાની નિકાસ પર પ્રતિબંધ લાદ્યો, કિંમતો વધી; ભારતે કહ્યું- જરૂરી પગલાં
9,499 કરોડ હજુ ચૂકવવાના બાકી છે
ડેટા મુજબ, વર્તમાન માર્કેટિંગ વર્ષ 2022-23 (ઓક્ટોબર-સપ્ટેમ્બર)માં 17 જુલાઈ સુધી ચૂકવવાપાત્ર કુલ રકમ રૂ. 1,13,236 કરોડ છે, જેમાંથી રૂ. 1,03,737 કરોડ ચૂકવવામાં આવ્યા છે અને રૂ. 9,499 કરોડ ચૂકવવાના બાકી છે. શેરડીના કુલ રૂ. 9,499 કરોડના લેણાંમાંથી, ઉત્તર પ્રદેશના મિલરોએ શેરડીના ખેડૂતોના રૂ. 6,315 કરોડના લેણાંની ચુકવણી કરવી પડશે. ગુજરાતમાં શેરડીની બાકી રકમ રૂ. 1,651 કરોડ અને મહારાષ્ટ્રમાં રૂ. 631 કરોડ છે.
જ્યોતિએ જણાવ્યું હતું કે સમયાંતરે ખાંડ મિલોની શેરડીના ભાવની ચુકવણીની સ્થિતિનું નિરીક્ષણ કરવા માટે રાજ્ય સરકારોને સત્તા સોંપવામાં આવી છે અને ચુકવણીમાં વિલંબના કિસ્સામાં તેમના દ્વારા યોગ્ય પગલાં લેવામાં આવે છે.
