સરકારી પ્રોત્સાહનો, સ્થાનિક બેટરી મેન્યુફેક્ચરિંગ, રાજ્ય સ્તરે સબસિડી અને ગુડ્સ એન્ડ સર્વિસ ટેક્સ (જીએસટી)ના દરમાં ઘટાડો દેશમાં ઇલેક્ટ્રિક વાહનોના પ્રવેશને વધારવામાં મદદ કરશે. મૂડીઝ ઈન્વેસ્ટર સર્વિસે એક રિપોર્ટમાં આ વાત કહી છે.
ભારત વૈશ્વિક સ્તરે ચોથું સૌથી મોટું કાર બજાર છે, પરંતુ ઇલેક્ટ્રિક વ્હીકલ (EV)નો પ્રવેશ માત્ર એક ટકા છે, એમ અહેવાલમાં જણાવાયું છે. રિપોર્ટમાં કહેવામાં આવ્યું છે કે 2030 સુધીમાં ઈલેક્ટ્રિક વાહનોના પ્રવેશને વધારવાનો સરકારનો લક્ષ્યાંક ચાર્જિંગ ઈન્ફ્રાસ્ટ્રક્ચર અને પરંપરાગત પેટ્રોલ, ડીઝલ વાહનોથી ઈલેક્ટ્રિક તરફ જવાના ગ્રાહકોના વલણ પર નિર્ભર રહેશે.
મૂડીઝે કહ્યું, “અમે માનીએ છીએ કે સરકારની વિવિધ પહેલ દેશમાં EVsનો પ્રવેશ વધારશે. તેમાં ગ્રાહકોને આપવામાં આવતા પ્રોત્સાહનોનો પણ સમાવેશ થાય છે. વધુમાં, અદ્યતન બેટરી સ્ટોરેજ માટે ઉત્પાદન-આધારિત પ્રોત્સાહનો, GSTમાં ઘટાડો અને રાજ્ય સબસિડી જેવા પરિબળો પણ EVsના પ્રવેશને વધારવામાં મદદ કરશે.
ભારત 2022 માં જાપાનને પાછળ છોડીને ચીન અને યુએસ પછી ત્રીજું સૌથી મોટું ઓટોમોબાઈલ માર્કેટ બનવા માટે તૈયાર છે. કેન્દ્રીય માર્ગ પરિવહન અને રાજમાર્ગ મંત્રી નીતિન ગડકરીએ ગયા મહિને કહ્યું હતું કે જો ભારત જમ્મુ અને કાશ્મીરમાં તાજેતરમાં શોધાયેલ લિથિયમ ભંડારને ટેપ કરી શકે છે, તો તે ઇલેક્ટ્રિક વાહન સેગમેન્ટમાં વિશ્વના પ્રથમ સ્થાને પહોંચી શકે છે.
લિથિયમ એ બેટરી બનાવવાનું મુખ્ય તત્વ છે જે ઇલેક્ટ્રિક વાહનોને પાવર કરે છે. સરકારનો 2030 સુધીમાં ખાનગી કાર માટે 30 ટકા, કોમર્શિયલ વાહનો માટે 70 ટકા અને ટુ અને થ્રી વ્હીલર માટે 80 ટકા EV વેચાણનો લક્ષ્યાંક છે.
મૂડીઝે જણાવ્યું હતું કે ટાટા મોટર્સ એપ્રિલ-ડિસેમ્બર, 2022માં 85 ટકા હિસ્સા સાથે બેટરી ઇવી માર્કેટમાં આગળ વધી રહી છે. મૂડીઝે જણાવ્યું હતું કે કંપની 165 શહેરોમાં 250 ડીલરો અને લગભગ 4,300 ચાર્જિંગ પોઈન્ટ્સ દ્વારા હાજરી સાથે 50,000 ઈવીનું વેચાણ કરી ચૂકી છે.
